Ырчы Николай Басков орус алып баруучусу Виктория Лопырёванын колун сурап, чечен президентинен күбө болууну өтүндү

Жакында Чечен Республикасынын борбору Грозный шаарында “Ахмат” футбол клубунун биринчи матчына арналган кечки тамактануу уюштурулуп, аталган өлкөнүн президенти жана орусиялык жылдыздар катышкан. Анда орустардын "алтын үндүү" ырчысы Николай Басков сүйүктүүсү алып баруучу жана “Мисс Россия-2013” сынагынын жеңүүчүсү Виктория Лопырёвага үйлөнүү тууралуу сунушун киргизип, чечен президенти Рамзан Кадыровдон алардын үйлөнүү тоюна күбө болуп берүүсүн өтүнгөн. Президент макул болуп, ыңгайлуу учурду өткөрүп жибербестен, дароо ырчыга үйлөнүү тоюн Грозный шаарында өткөрүүнү сунуштаган. Бул боюнча президент өзү социалдык тармактагы баракчасына видео жүктөп, анын астына кыскача билдирүү калтырган.

“Аз калды! 5-октябрь Грозный шаарынын туулган күнүнө карата кылымдын үйлөнүү тою орун алмакчы. Орус Федерациясынын Эл артисти Николай Басков жана белгилүү алып баруучу Виктория Лопырёва баш кошот”, - деп жазган президент.

Бул боюнча алып баруучу эч кандай комментарий бере элек. Ал эми Басков социалдык тармактагы баракчасына сүйүктүүсү менен түшкөн сүрөттү жүктөп, “жашоо керемет” деген билдирүү калтырган.