Владивостокто күзөтчү болуп иштеген 18 жаштагы Кыргыз жараны бир бөтөлкө суу үчүн 52 жаштагы адамдын колунан каза тапты

Орусиянын Владивосток шаарындагы дүкөндө күзөтчү болуп иштеген 18 жаштагы А.С. аттуу Кыргыз жараны бир бөтөлкө суу үчүн жүрөгүнө бычак сайылып каза болду. Окуя 16-июль күнү саат 19:00 чамасында "Престиж" аттуу дүкөндүн жанында катталган.

Орусиялык ЖМКлардын жергиликтүү укук коргоо органдарына шилтеме кылып берген маалыматына караганда, мас абалдагы адам дүкөндөн бир бөтөлкө суу алып, акчасын төлөбөй сыртка чыгып кеткен. Аны байкап калган күзөтчү артынан барып, акчасын төлөөнү талап кылган. Бирок ал дүкөндүн арткы тарабына жеткенде күзөтчү Кыргыз жаранынын жүрөгүнө бычак сайып жиберген. Алган жаракатынан улам күзөтчү ошол жерден каза болуп калган. Кылмышка шектүү күзөтчүнүн жүрөгүнө бычак сайып жибергени дүкөндүн видеокамерасына түшүп калган.

Жергиликтүү полиция кызматкерлери 17-июль күнү кылмыш ишине шектүү деп 52 жаштагы Орусия жаранын колго түшүргөн. Ал из жашырып шаардан качып кетүүгө аракет кылып, бирок тилеги ишке ашкан эмес. Факты боюнча кылмыш иши козголду.

Орусиядагы элчиликтин маалымат кызматы SUPER.KG'ге каза болгон жарандын сөөгүн Кыргыз мамлекетине жиберүү аракети көрүлүп жатканын билдирди.