Билим берүү министрлиги: “Бүтүрүүчүлөрдүн аттестатындагы катаны министрликтин жооптуу кызматкери жана басмакана кетирген”

“Бүтүрүүчүлөрдүн аттестатындагы катаны министрликтин жооптуу кызматкери жана басмакана кетирген”, - деп билдирди бүгүн, 18-июлда Билим берүү жана илим министрлигинин басма сөз кызматы.

Маалыматка ылайык, министр Гүлмира Кудайбердиева жана “Тартип” жабык акционердик коомунун директорунун милдетин аткаруучу Алена Артеменко бул маселенин үстүндө сүйлөшүп, бир чечимге келген. Жараксыз болуп калган аттестаттар толугу менен 20-21-июлда даярдалып бүтөт. Мындан тышкары министрликтен билдиргендей, аттестатты кайрадан алмаштырууга кеткен чыгымдарды басмакана каржылоону моюнуна алган.

Эске салсак, быйыл өлкө аймагында айрым мектеп бүтүрүүчүлөрүнүн жалпы орто билими жөнүндө аттестаты жараксыз болуп чыккан. Билим берүү жана илим министрлиги ката басмакана тарабынан кетирилгенин билдиришкен. Анда аттестаттын сыртына жазылган "Кыргыз Республикасынын" деген сөздүн аягында "н" тамгасы жазылбай калган. Бүгүн басмакананын директору катаны алар кетирбегенин айткан.