ВИЧ, СПИД менен күрөшүүгө каражат толук бөлүнбөсө 5600 жаран каза болуп, ооругандардын саны 20 миңге көбөйө тургандыгы айтылды



Өлкөдө ВИЧ, СПИД илдеттери менен ооруган жарандарды дарылоого каражат жетишсиз. Бул тууралуу бүгүн, 19-июлда Саламаттыкты сактоо министрлигинде өткөн тегерек столдо белгилүү болду. Анда айтылгандай, ВИЧ, СПИД менен күрөшүүгө жумшала турган чыгымдын 24 пайызы гана мамлекеттик бюджеттен каржыланат.
"Жылына мамлекет тарабынан ВИЧ, СПИД менен жабыркагандарды дарылоо, профилактика иштери үчүн болгону 20 миллион сом бөлүнөт. Бирок жыл сайын бул ооруга кабылгандардын саны өсүп жатат. 2012-жылдан бери алардын саны 2 эсеге жогорулады. Бирок каржы маселеси ошол бойдон калууда. Жыл сайын мамлекеттен 120 миллион сом каражат бөлүнсө илдетке кабылгандарды дарылоого, анын жайылышынын алдын алуу чараларын көрүүгө жетиштүү болмок. Эгер бул каражат бөлүнбөсө 2020-жылы 5600 мекендешибизди жоготобуз жана дагы 20 миң жашоочу аталган ооруга кабылышы мүмкүн", - деди Саламаттыкты сактоо министрлигинин Коомдук кеңешинин башчысы Айбар Султангазиев.
Ал белгилегендей, инфекцияны көбүнчө баңгизат пайдалангандар, жыныстык катнаш менен кызмат көрсөткөндөр, кумсалар алып жүрөт. Баңгилердин 14 пайызы ВИЧ, СПИДге кабылган. Учурда жыныстык катнаштан улам бул илдетти жуктургандардын да саны көбөйүүдө.






1 |