Бишкекте короо шыпырган аял менен байланышкан мушташтын чоо жайы айтылды

16-июлда Бишкек шаарындагы Жаш Гвардия бульварында бир топ кишинин катышуусунда мушташ чыкканы маалымдалган. Мушташтын келип чыгуу себептери тууралуу Ленин райондук салык кызматынын мекемесинин короосун шыпырып иштеген Сабилат Орозбаева SUPER.KG порталына айтып берди.

Орозбаеванын айтымында, 6 жылдан бери аталган мекеменин короосун шыпырып иштейт. 4 500 сом айлык алат.

"Ошол жердеги жашоочуларды мен сыртынан тааныйм, "чаңытпа, тигинтип шыпыр, минтип шыпыр",- деп айта берет. Мен ага көнүп калгам, ошол күнү да шыпырып жатсам ошол аялдар кыйкырып жатышты, демейдегидей көңүл бурбай эле жумушумду уланта бердим. Ошол аялдарга жакын отурган бир киши "Эй, акмак, сага айтып жатат, укпай жатасыңбы", - деп кайрылды. Мен да ачууланып, эмнеге энең менен тең аялга антип сүйлөйсүң десем, мени көздөй таш ыргытты, ал таш колума тийди. Кан басымым бар болгондуктан өзүмдү жаман сезе баштадым, дарыларымды жаныма албагандыктан эжеме чалып дары алып келишин өтүндүм. Аңгыча балдарым келип калды. Уялбай эле айтайын, күйөөм экөөбүздүн жеке мамилебизге чейин асылып, мени абдан уят сөздөр менен кемсинтти. Балдарым дарыларымды берип жатканда жанагы киши келип калды. Анан каны кызуу балдар бирөө анын апасына ошентип сүйлөп жатса карап турбайт да. Ошентип мушташ чыгып кетти, аңгыча мушташкандарды ажыратып калышты. Эки балам эки жагымдан колтуктап Жаш Гвардия бульвары жакка чыгып баратканыбызда бир унаадан топ балдар түшүп эле 2 баламды басып калышты. Мен инсульт болуп калбайын деп газонго жата калдым", - деди Орозбаева.

Ал өзүнүн дарегине айтылган сөздөр өзүнөн да балдарын катуу ыза кылганын белгилеп, мушташтан бир баласы жабыркап Бишкек шаардык травматология жана ортопедия илимий изилдөө борборунда дарыланып жатканын кошумчалады. Мушташтан кийин баш мээси чайкалып, сол бутунан жаракат алган Өмүрбек Нуржигит уулу буларга токтолду.

"Биз барып ал кишиге жакшы айтып, кечирим эле сурасын дейин дегенбиз. Аңгыча эле ал бир-бирден келгиле деп агамды муштап жиберди. Ошол жердин жашоочулары болсо керек, кошулуп кетип 7-8дей кишиге көбөйдүк. Апам чөптө начар абалда жаткан эле, мушташты токтотуп көчө жакка чыктык. Бул убакта унаа токтоп ичинен дагы топ балдар түштү. Ошентип агам экөөбүздү сабап салышты. Мен көргөм, ал киши телефондон сүйлөшүп жаткан, ошол унаа менен келген балдарды ошол чакырып коюшу мүмкүн", - деди Өмүрбек.

Бул боюнча Бишкек шаардык ички иштер башкы башкармалыгынын басма сөз кызматынын инспектору Майрамкүл Аскарбекова төмөнкүлөрдү айтып берди.

"Окуя боюнча кылмыш иши козголо элек. Эки жак тең арыз жазган, ооруканада дарыланып жатышат. Ал жактан чыккандан кийин дарыгерлердин бейтаптардын ден соолугуна байланыштуу билдирмесине карата юридикалык баа берилет", - деди. Ошондой эле эки тараптын арызын эки тергөөчү карап, учурда материалдар чогултулуп жатканын кошумчалады.

SUPER.KG порталы экинчи тараптын оюн угууга даяр.