СУПЕРСТАН: "Мечиттеги садагага чогулган акча кайда жумшалат жана аны ким эсептеп, көзөмөлгө алат?"

SUPER.KG порталынын "Суперстан" бөлүмүндө "Мечиттеги садагага чогулган акча кайда жумшалат?" деген тема талкууга алынууда.

Темада автор мындай суроо салган: "Менин бул суроомо, балким, таң калат чыгарсыздар. Чынында аз эмес акча топтолот. Алардан ким отчёт алат? Ушул убакка чейин мечиттен баланчага мындай жардам көрсөтүлдү дегенди уккан эмесмин. Мына, гезиттин ар бир жаңы санына кыйын күндү кечирген тагдырлар чыгып жатат. Ушул убакка чейин молдокелердин жардам бергенин билбейм. Балким, менин кабарым жок чыгар, кечирип коюңуздар. Катар-катар менен мечиттердин эле салынганын көрбөсөм. Карапайым калкка пайдасы тийип жатабы? Көзөмөлгө ким алат? Садаганы кайда коротушат?"

Темадагы билдирүүлөр:

"Садаганы эл көзүнө берген же жакшы ишти эл көзүнө көрсүн деп кылган адамга сооп бул дүйнөдө гана жазылып калат. Эгер чын ниеттен бирөөгө жардам берүүнү кааласа купуя бергени жакшы. Ал эми мечитке түшкөн акча молдолордун айлык маянасына (2-3 жылдан бери пайда болуптур), медреседе билим алып жаткан жаштарга (медреседе бекер окутат) жумшалышы мүмкүн. Аны бир Кудай жана муфтий, казылар билет. Ал эми айылдык молдокелер алган акчаны ошол шаарга барып төгүшөт".

"Канча жылдан бери намаз окуп, мечитке каттайм. Ушул садаганын акчасын ким, каякка жумшайт деген суроону эч кимге бербептирмин. Бир билгеним бар ошол мечитке түшкөн акча кайра эле ошол мечиттин өзүнө жумшаларын. Ал жерде миллиондогон акчалар жок. Силер кызыккан ислам дининде, шариятта көп жакшы нерселер бар. Эмне үчүн ошончо жакшы нерселерди көрбөй, ушул кичинекей нерселерден айып издеген адамдарга таң каласың".

"Мечитке барып турганыңда ал акчага маани да бермек эмессиң. Себеби ал акчалар адал нерсеге жумшалат. А битир жана башка учурда чогулган акчалар бей-бечараларга таркатылып берилет. Сен укпасаң же көрбөсөң молдолор жеп алды, же эч кимге таркатып бербей койду деген маанини түшүндүрбөйт. Деги эле молдолордон жардам күтпө, алар сага же башкага жардам берүүгө милдеттүү эмес, тескерисинче, биз аларга жардам берүүгө милдеттүүбүз".

Талкууга кошулгуңуз келсе, бул жакка кириңиз.