Кайрат Мусаев жаңыдан түзүлгөн Соттук-эксперттик мамлекеттик кызматынын төрагасы болуп дайындалды

Кайрат Мусаев жаңыдан түзүлгөн Соттук-эксперттик мамлекеттик кызматынын төрагасы болуп дайындалды. Тийиштүү буйрукка Кыргыз Республикасынын премьер-министри Сооронбай Жээнбеков бүгүн, 20-июлда кол койду. Бул тууралуу өкмөттүн басма сөз кызматы билдирди.

Кайрат Мусаев 1985-жылы 26-октябрда туулган. 2006-жылы КУУнун Юриспруденция факультетин бүтүргөн. Жазык аткаруу системин реформалоо башкармалыгында инспектор, Жазаларды аткаруу мамлекеттик кызматында улук инспектор, Өкмөттүк аппаратта пландоо жана анализ бөлүмүнүн башчысы, президенттик аппаратта мамлекеттик жана аймактык башкаруу, кадрдык иш бөлүмүндө эксперт болуп эмгектенген.

"Кыргыз Республикасынын өкмөтүнө караштуу Соттук-эксперттик мамлекеттик кызматы Кыргыз Республикасынын өкмөтүнүн 2017-жылдын 14-июлундагы токтому менен түзүлгөн. Буга чейин Кыргыз Республикасынын Коргоо кеңешинин жыйынында республикада бирдиктүү соттук-эксперттик орган түзүү, Юстиция, Саламаттыкты сактоо, Ички иштер министрликтеринин эксперттик түзүмдүк бөлүмдөрүн бириктирүү чечими кабыл алынган", - деп айтылат маалыматта.