Индияда жашоочулар пилдин баласын сууга тумчугуп калуудан сактап калуу үчүн 3 саат күрөштү

Индиянын Батыш Бенгалия штатынын жергиликтүү жашоочулары пилдин баласын сууга чөгүп кетүүдөн сактоо үчүн 3 саат күрөштү. Чет элдик маалымат каражаттары жазып чыккандай, кичинекей пил жакын жерде жайгашкан токойдон эл жашаган аймакка суу ичүү үчүн келген. Бирок ал бетон аралашкан резервуарга түшүп кеткен. Жергиликтүү тургундар ач кыйкырыкты угуп резервуарга келгенде пилдин баласынын жандалбастап жатканын көрүшкөн.

Тургундар куткаруучулар менен жаныбарларды коргоочуларды чакырышкан. Ага чейин өздөрү пилди сактап калуу аракетин көрүшкөн. Резервуар өтө терең болбогону менен пилдин баласынын корккондон шаштысы кетип, ары-бери урунуп жатканын көрүүгө болот.

Жашоочулар суу ичүү үчүн пилдер алар жашаган жерге көп эле келерин айтышкан. Куткарылган пил дароо эле токойду көздөп бет алган.