Прокурор Садыр Жапаровду 15 жылга эркинен ажыратууну сурады

Бишкекте бүгүн мурдагы депутат Садыр Жапаровдун иши боюнча соттук отурум уланды. Анын жүрүшүндө жактоочу Аида Абдырахманова мамлекеттик айыптоочуга ишенбөөчүлүк көрсөттү.

Абдырахманованын келтирилген өтүнүчүн кесиптештери колдоду. Сот кыска тыныгуу жарыялап, кеңешме бөлмөсүнөн келген соң прокурорго ишенбөөчүлүк көрсөтүүгө негиз жок экенин айтты. Андан соң жактоочу Акин Токталиев соттун төрагасы Эмилбек Каиповго ишенбөөчүлүк келтирди. Бирок сот буга чейин да өзүнө карата ишенбөөчүлүктөр көрсөтүлгөндүгүн эскертип, өтүнүчтү ордунан четке какты.

Эскерте кетсек, Жапаровдун соттук ишинин башынан бери мамлекеттик айыптоочу катары катышып жаткан Доктурбековго 2 ирет, төрага Каиповго 5 ирет ишенбөөчүлүк келтирилип, бири да колдоо тапкан жок.

Отурумда сот жарыш сөзгө чыгуу үчүн сөздү прокурорго берди. Ал соттолуп жаткан Садыр Жапаровду 2013-жылы 7-октябрдагы Каракол шаарында өткөн митингге тиешеси бар экендигинин себептерин айтып берди. Негизги берене боюнча Жапаровду 13 жылга, бардык беренелер боюнча жалпы бириктирип 15 жылга эркинен ажыратууну сурады. Сот отурум жумуш убактысы бүткөндүгүнө байланыштуу 28-июлда улана турган болду.