Неймар "Барселонадан" кетеби?

Испаниялык "Барселона" футбол клубунун жылдызы Неймарды франциялык "ПСЖ" клубу өзүнүн катарына чакырып жатканы айтылууда. Чет элдик басылмалардын маалыматтарына ылайык, аталган клуб Неймарды 222 миллион еврого сатып алууга даяр. Эгер ал сунушту кабыл алса, 1 жылдык айлыгы 30 миллион евродон ашык сумманы түзөрү маалымдалат.

Учурда бул тууралуу "ПСЖ" футболдук клубу, "Барселона" клубу жана Неймар өзү эч кандай расмий билдирүү жарыялай элек.

Неймар "Барселонада" толук кандуу жылдыз боло албай, Мессинин артында калып жатканы үчүн клубун алмаштырып кетиши мүмкүн экенин жазышууда басылмалар. Азырынча каталондук клуб бразилиялык чабуулчудан арылууну эп көрбөйт. Анткени Неймарды сатуу менен күчтүү үчилтик Суарес-Месси-Неймар ыдырайт.

Быйылкы футбол трансфердик мезгили август айынын соңунда аяктайт. Андыктан футболчу бул тууралуу расмий түрдө сөз айтпаган соң, демек, мындай сөздөр жайдын аягына чейин улана бермекчи.