Президенттикке талапкерлер мамлекеттик тилди билүү деңгээли боюнча 4 бөлүктөн турган тестирлөөдөн өтүшөт

Президенттикке талапкерлер мамлекеттик тилди билүү деңгээли боюнча 4 бөлүктөн турган тестирлөөдөн өтүшөт. Бул тууралуу бүгүн, 25-июлда “Кыргызтест” системинин жол жоболорун көрсөтүү учурунда адис Батма Топоева билдирди.

Маалым болгондой, лексика-грамматика, жазуу тестине 50 мүнөт убакыт берилет, угуу боюнча тестирлөөгө 25 мүнөт, окууга 25 мүнөт берилет. Ал эми сүйлөөнү текшерүү боюнча тестирлөөдө талапкерлер 20 мүнөттө бир окуяны баяндап бериши каралган.

“Эгерде талапкер тест боюнча зарыл болгон жалпы баллды топтой алса, бардык субтесттердин суммасынын 60 пайызынан ашса, ага В2 “Ортодон жогору” деңгээлде мамлекеттик тилди биле турганын ырастаган Мамлекеттик тил боюнча улуттук комиссиянын сертификаты берилет. Эгерде талапкер 100 пайыздын ичинен 60 пайыздан аз балл топтосо, ага субтесттер боюнча алган баллы көрсөтүлгөн маалымкат берилет”, - деди ал.

Ошондой эле тесттин жыйынтыгына нааразы болгон талапкер 3 күндүн ичинде арыз менен кайрылып, кайра тапшырса боло турганын белгиледи.