Өлкөдө дарыга туруктуу кургак учуктан жабыркагандардын саны өсүүдө

Өлкөдө дарыга туруктуу кургак учуктан жабыркагандардын саны өсүүдө. Бул тууралуу бүгүн, 26-июлда өткөн "Кургак учукту көзөмөлдөө чөйрөсүндө инновациялык технологиялар" аттуу жыйында Улуттук фтизиатрия борборунун директору Абдулат Кадыров билдирди.

Анын айтымында, кургак учуктун мындай түрү туура эмес дарылануудан улам келип чыгып, ага чалдыккан адамдарга 20 айдан ашык убакыт организмге зыянын тийгизе турган 6 препараттын жардамы менен дарыланууга туура келет.

"Акыркы 3 жылда кургак учук илдетинен каза болгондордун, ага чалдыккандардын саны азайды. Бирок дарыга туруктуу кургак учуктун санында өсүү байкалууда. Мындай көрсөткүч биздин өлкөдө эле эмес, дүйнө жүзүндө дагы бар. Андыктан аны дарылоо мөөнөтүн кыскартуу боюнча долбоорлорду иштеп чыгуудабыз", - деди ал.

Тегерек столдо 2016-жылдын июль айынан бери Кыргыз өлкөсүндө "Кургак учук менен ооругандарды диагностикалоо жана дарылоону мониторингдөө үчүн биологиялык үлгүлөрдүн транспорттоосун ишке ашыруудагы инновациялык мамиле" долбоору ишке ашырылып жатканы айтылды. Маалыматка караганда, анын алкагында Сокулук районунда какырыктарды транспорттоо медициналык кызматкердин катышуусу жок жүзөгө ашырылып жатат.