Ичине бычак сайылып жатып калган кыздын видеосу интернетке тарап, ал атайын уюштурулган оюн болуп чыкты

25-июль күнү саат 16:00 чамаларында Бишкектеги "Дордой" базарында бир кыздын ичине бычак сайылып, ал жерге жатып калганы боюнча видео интернетке тараган. Бишкек ШИИББинин басма сөз кызматынын жетекчиси Адыл Оморовдун SUPER.KG'ге билдиришинче, бул окуя кыздын элдин көңүлүн бурдуруу үчүн атайын уюштурган кылыгы болуп чыкты. Анын айтымында, кызга бычак сайылган эмес. "Эч кимге, эч кандай бычак сайылган эмес, болгону бул кыз элдин көңүлүн өзүнө буруу үчүн уюштурган оюну болуп чыкты. Видеодо кыз ичине бычак сайылгандай абалда болуп жолго жатып алганы гана тартылган, бирок эл чогулуп калганда ал ордунан туруп алып басып кеткен экен", - деди Оморов.

Бул оюнду уюштургандарга чара көрүлөт.

"Видеого тартылган кыз жана аны тартып алгандар кимдер экендиги аныкталды. Мындай кылыктары үчүн аларга чара көрүлөт", - деп кошумчалады Оморов.