Монголиянын президенти мамлекеттик 49 ишкерге уурдаган акчаларын 49 күндүн ичинде өлкөгө кайтарууну айтты

Монголиянын президенти Халтмаагийн Баттулга мамлекеттик ишмерлерге жана саясатчыларга кайрылуу жасады. Чет элдик маалымат булактары жазгандай, президент криминалдык жол менен, коррупция жана алдамчылык ыкмалары менен акча алганга шектелген мамлекеттик 49 ишкерден оффшордук эсептеги каражаттарын өлкөгө кайтарууну талап кылган.

"Монголиянын президенти катары оффшордук эсеби бар саясатчыларды, мамлекеттик ишмерлерди жана аларга байланышы бар адамдарды 49 күндүн ичинде эсепти жаап, андагы акчаны мамлекетке кайтарып берүүгө чакырам. Эгер ким бул талапты аткарбаса ага карата иликтөө иштери жүргүзүлөт жана мыйзам чегинде жоопко тартылат", - деген мамлекет башчысы. Ошондой эле ал каражат Монголиянын улуттук "МонголБанк" банкына которулуусу керек экенин, талапты аткарбагандардын эсебиндеги акча кандай жол менен алынгандыгы ачыктала турганын кошумчалаган.

Халтмаагийн Баттулга бул кайрылууну 24-июлда жасап, оффшордук эсептер ошол күндөн тартып 49 күндүн ичинде жабылуусу керек экенин белгилеген.