Муфтият Рамазан айында канча битир-садага чогулганын жана кайсы жакка коротуларын билдирди

2017-жылдын Рамазан айында республика боюнча 33 миллион 668 миң 886 сом битир-садага чогулган. Бул тууралуу Муфтияттын басма сөз кызматынан билдиришти.

Маалыматка ылайык, чогулган акча Дин башкармалыгы тарабынан өлкө аймагындагы казыяттар жана мечиттердин арыз кайрылууларынын негизинде мүмкүнчүлүгү чектелген, кароосуз калган адамдарга, жетим-жесирлерге таратылып берилүүдө.

Ошондой эле аталган маалыматта быйылкы топтолгон битир-садагадан Ош облусунун Өзгөн жана Чоң-Алай райондорундагы жаратылыш кырсыгынан жабыр тарткандарга жалпысынан 3 миллион 200 миң сомдук жардам берилгени айтылат.

Андан сырткары быйылкы жылы кабыл алынган арыздардын негизинде комиссиянын чечими менен 1 миллион 900 миң сом муктаж жарандарга таратылып берилген. Алардын арасында оор операцияга дуушар болгондор жана бөйрөк оорусунан жабыркаган адамдар дагы болгон.

Маалымат катары, быйыл битир-садага былтыркыдан 1 миллион 512 миң 281 сомго көп чогулган.