Чет өлкөдө эмгектенген Кыргыз жарандарынын саны өткөн жылга салыштырмалуу 30-40 миңге өстү

Чет өлкөдө 710 миң Кыргыз жараны иштеп жүрөт. Мындай маалымат бүгүн, 27-июлда Мамлекеттик миграция кызматынын маалымат жыйынында айтылды.

"Бүгүнкү күндө 710 миңге жакын адам эмгек миграциясында чет өлкөдө иштеп жүрөт. Бул көрсөткүч 2016-жылга салыштырмалуу 30-40 миң адамга көп экендигин билдирет. Мигранттардын 616 миңи Орусияда жүрсө, Казакстанда 30 миң адам бар. Кореяда 14 миңдей Кыргыз жарандары иштейт. Ал эми 20 миңдей адам Европа өлкөлөрүндө эмгектенет. Биздин дагы бир маселебиз - мигранттарды укуктук жактан коргоо. Учурда бул тармакта иштеп жатабыз. Мигранттардан 2017-жылдын 1-жарым жылдыгында 605 миллион доллар өлчөмүндө каражат которулган. Бул көрсөткүч 2016-жылга салыштырмалуу 145 миллион долларга көп", - деди Миграция кызматынын башчысы Медетбек Айдаралиев.

Миграция кызматы мигранттарды укуктук маалымат алууга чакырды.