"Ата Мекен" партиясынын мүчөлөрү Өмүрбек Текебаевге тест тапшыруу мүмкүнчүлүгү берилбесе, ачкачылык жарыялай турганын айтып чыгышты

Бүгүн, 27-июлдагы маалымат жыйынында "Ата Мекен" партиясынын саясий кеңешинин мүчөсү Асия Сасыкбаева президенттикке талапкерлигин койгон Өмүрбек Текебаевге тест тапшыруу мүмкүнчүлүгү берилбесе, партиянын 10 чакты мүчөсү ачкачылык жарыялай турганын билдирди.

Ал Борбордук шайлоо комиссиясы Текебаевдин документтерин кабыл алып, бирок тест тапшырууга шарт түзүп берүү маселесин чечип бербей жатат деген пикирин айтты.

"БШК Өмүрбек Текебаевдин документтерин кабыл алды, биз 40 миң кол чогулттук. Үчүнчү этап - тест тапшыруу эле. Бирок ага Текебаевди жөнөтпөй жатышат. Бүгүн соттук отурум жактоочу жана айыпталуучулардын катышуусуз өттү. Бул көйгөйгө көңүл бурдуруу үчүн Өмүрбек Текебаев, Дүйшөнкул Чотонов жана алардын тарапташтарынын ачкачылык жарыялашынан башка жолду көрбөй жатабыз", - деди Асия Сасыкбаева.