Баткенде аскер кызматкерлери сууга аккан кызды куткарып калышты

Баткен шаарында Улуттук гвардиянын кызматкерлери шар аккан каналдан (быстроток) 25 жаштагы кызды куткарып калышты. Бул тууралуу Кыргыз өлкөсүнүн Куралдуу күчтөрүнүн башкы штабынын басма сөз кызматынан билдиришти.

Маалыматка ылайык, 26-июль күнү Улуттук гвардиянын 707-бөлүгүнүн келишимдик негизде иштеген кызматкери Талантбек Бегали уулу үйүндө отуруп канал тараптан жардам сурап кыйкырган үндү уккан. Чуркап чыгып агып бара жаткан кызды көргөн. Ал дагы эки жолдошу менен кызды куткаруу үчүн унаа менен 3 чакырымдай жерди басып өтүп, бир нече жолу куткарууга аракет кылышкан. Аягында аскер кызматкери мүмкүнчүлүктөн пайдаланып сууга секирип түшүп кызды куткарып калган. Кийин эс-учун жоготкон кызды Баткен аймактык ооруканасынын жандандыруу бөлүмүнө алып келишкен.

Ал 1992-жылы төрөлгөн Жазгүл Турсуналиева аттуу Баткен шаарынын тургуну болгон.

Мындан сырткары аталган маалыматта учурда сууга аккан кыздын абалы жакшы экендиги, жандандыруу бөлүмүнөн хирургия бөлүмүнө которулгандыгы айтылат.