Текебаев менен Чотоновдун соту: "Айыпталуучулар сот залынан чыгарылып, отурум алардын катышуусуз уланууда"

Бүгүн, 28-июлда Бишкек шаарынын Биринчи Май райондук сотунда Өмүрбек Текебаев менен Дүйшөнкул Чотоновдун иши боюнча соттук отурум уланды. Анда Текебаевдин жактоочусу Чынара Жакупбекова сот тарабынан сунушталган жактоочу Элмира Чоноеванын акысыз адвокаттык кызмат көрсөткөндөрдүн катарында жок экенин айтып, аны отурумдан четтетүү өтүнүчүн келтирди.

Ал эми Текебаев Чоноеванын кызматынан баш тартып, жактоочусунун өтүнүчүн колдоду. Сот тараптардын пикирин уккан соң өтүнүчтү канааттандырды.

Андан соң Өмүрбек Текебаев ден соолугуна байланыштуу өзүнө келип алуу үчүн эки күн убакыт сурады. Бирок сот ага макул болгон жок. Мындан улам Текебаев менен Чотонов сотко ишенбөөчүлүк көргөзүштү.

"Биз жактоочулар менен 15 жолу сизге ишенбөөчүлүк көргөздүк. Баары канааттандыруусуз келе жатат. Мен бул сот адилеттүү болушуна ишенбейм. Ошондуктан сизге дагы бир жолу ишенбөөчүлүк жарыялайм", - деди Текебаев.
Сот өтүнүчтү кабыл албай турганын айтып, сот залында тартипти сактоону сурады. Текебаев сотко мыйзамды сактоону талап кылгандан кийин сот айыпталуучуну сот залынан чыгаруу боюнча чечим кабыл алды. Текебаев залдан чыгарылган соң Чотонов "сиз мени соттогонго моралдык укугуңуз жок. Ошондуктан мен да сизге ишенбөөчүлүк жарыялайм" деди. Сот бул өтүнүч каралбай турганын айткан соң Чотонов да отурумга катышуудан баш тартты.
Учурда сот айыпталуучулар жок уланууда.