Адис: "Кыргыз өлкөсүндө жылына 2500 адам гепатит дартын жуктуруп алат"

Кыргыз өлкөсүндө жылына 2500 адам гепатит дартын жуктуруп алат. Бул тууралуу бүгүн, 28-июлда Бүткүл дүйнөлүк гепатитке каршы күрөшүү күнүнө карата өткөн маалымат жыйынында Медициналык жардам жана дары саясаты уюмунун башкармалыгынын башчысы Саматбек Тойматов билдирди.

"А гепатитин жуктуруп алгандардын 85 пайызы кичинекей балдар. Алар көпчүлүк учурда колдорун жуубай, жер жемиштерди кир боюнча жегенде бул ооруга чалдыгат. Ал эми сарык өтүшүп кеткенде цирроз жана рак илдетине алып келет. Саламаттыкты сактоо министрлиги акыркы жылдары өлкөнүн бардык аймактарында гепатитти жуктуруп албоо боюнча профилактикалык иштерди жасап жатат", - дейт ал.

Республикалык клиникалык инфекциялык оорукананын башкы дарыгери Гүлжигит Аалиев күнүнө 20 адам гепатитти жуктуруп алгандыгын айтып кайрыларын, алардын ичинен жетөө ооруканага жаткырыла турганын айтты.

Саламаттыкты сактоо министрлигинин өкүлдөрүнүн айтымында, мамлекет гепатитке каршы вакцинация жана башка дарылоо иштери үчүн 2 миллион сом бөлүп берген.