Өлкөдөгү мыкты деп табылган 6 айыл өкмөтүнө 1,5 миллион сомго чейин акчалай сыйлыктар тапшырылды

Премьер-министр Сооронбай Жээнбеков бүгүн, 28-июлда Кыргыз Республикасынын өкмөтүнүн атынан "Мыкты айыл өкмөтү - 2016" сынагынын жеңүүчүлөрүнө акчалай сыйлык жана диплом ыйгарды.

Аталган сынакка катышкан айыл өкмөттөрү 2 топко бөлүнүп каралган:

1-топтон 1-орунду Нарын облусуна караштуу Ат-Башы районундагы Ак-Талаа айыл өкмөтү алып, 1 миллион 500 миң сом каражатка ээ болду. 2-орунга татыктуу деп табылган Баткен районундагы Дара айыл өкмөтүнө өкмөт башчы 1 миллион сом өлчөмүндөгү сыйлык тапшырды. 3-орунга Алай районуна караштуу Талды-Суу айыл аймагы татыктуу деп табылып, 500 миң сом акчага арзыды.

2-топтогу айыл аймактан: 1-орун Талас облусундагы Кара-Буура районуна караштуу Бейшеке айыл өкмөтүнө берилип, 1,5 миллион сомго татыса, 2-орундун ээси Ысык-Көл облусундагы Ак-Суу районундагы Ак-Чий айыл аймагына 1 миллион сом тапшырылды. 3-орунга Жалал-Абаддын Сузак районундагы Сузак айыл өкмөтү татыктуу деп табылып 500 миң сом акчалай сыйлыкка ээ болду.

Жеңүүчүлөр төмөндөгүдөй талаптар менен тандалып алынган:

- Айыл өкмөтүндөгү жашоочулардын жашоо-шартын жакшыртуу;

- Айыл аймактагы тарыхый-маданий эстеликтер менен маданият мекемелерин жакшыртуу жана аларды сактап калуу чараларын көрүү;

- Айыл чарбасын жана өндүрүштү өнүктүрүү;

- Жаңы жумуш орундарын түзүү;

- Айылдардагы чарбалык кооперативдерди өнүктүрүү;

- Жергиликтүү бюджеттин кирешелерин көтөрүү үчүн иш-аракеттерди көрүү;

- дотацияны кыскартуу;

- инвестиция тартуу;

- санитардык-эпидемиологиялык абалды жана инженердик коммуникацияны жакшыртуу.