Индияда кобра фестивалы башталды

Индияда кобра фестивалы башталды. Чет элдик маалымат булактары жазгандай, кобра фестивалы Индиянын бардык аймагында, өзгөчө Махараштра, Батыш Бенгалия штаттарында кызуу белгиленет.

Уулуу жыландарды жоошутуп, чакпай турган абалга келтирүү максатында индиялыктар бул майрамда массалык түрдө кобраларга сыйынышат. Бул күнү Индиянын шаар, айылдарынан кобраларды тор баштыктарына салып алып, түрдүү ыкмаларды көрсөтүп берип жаткан тургундарды көрүүгө болот. Жергиликтүүлөрдүн ырымы боюнча, жолдон өтүп бара жаткандар жылан салынган корзинага токтолуп, сүт, күрүч, суу жана мөмө-жемиштерди тартуу кылышат.

Кобра фестивалы - дүйнөдөгү эң таң калычтуу иш-чаралардын бири болуп саналат. Бул майрам июль айынын аягы, август айынын башындагы күндөрдө белгиленет. Ушул мезгилде жыландар ийининен чыгат, бирок бул айларда Индияда жаан-чачын көп жаагандыктан жыландар жаандан качып бактарга, ал тургай адам жашаган үйлөргө чейин сойлоп барып жашынат. Адамдын өмүрүнө коркунуч жараткан жандыкты кас кылып албоо максатында индиялыктарда бул майрам пайда болгон.