Москвага жумуш издеп барган кыргыз кызы кырсыкка кабылып, ооруканага түштү. Учурда барар жери, кайрылар адамы жок болууда

Орусиянын Москва шаарына жумуш издеп барган А.Караева кырсыкка кабылып, бейтапканага түштү. Мындай маалыматты бүгүн, 29-июлда SUPER.KG порталына кырсыкка кабылган Караева өзү айтып берди.

"Мен "Марксисткая" метросуна жакын жерден жумуш издеп жүргөм. Кырсык болуп ак түстөгү унаа аркасы менен келип сүзүп кетти. Эс-учумду жоготкондо айланадагы адамдар "Тез жардам" чакырып бейтапканага алып барышыптыр. Ал жерге полиция кызматкерлери да келишкен. Мени сүзүп кеткен унаанын ээси белгисиз болууда. Көтөрүп жүргөн сумкама 50 евро салып кетишиптир. Ошол эле учурда дарыгерлер мени көп кабаттуу үйдөн кулап кеткен деп жатат. Анткени алар окуяны билишпейт болчу. Биз болсо сүзүп кеткен унаанын ээсин таппай жатабыз. Дарыгерлер баш мээм чайкалган деген диагноз коюшту. Ашказаныма да доо кетиптир, жегенимди кайра эле чыгарып жатам.

1-августта ооруканадан чыгам. Буга чейин жашап жаткан батирдин ээси үйдөн чыгарып койгонун жанымда жашаган кыз айтты. Кайда барарым белгисиз болуп жатат", - деп билдирди Караева.

А.Караева Чүй облусунун Чүй районуна караштуу Сайлык айылынын тургуну. Ал 29 жашта, 4 баланын апасы. Кырсыкка кабылган Караева элчиликтен жана коомчулуктан материалдык жана моралдык жактан жардам сурайт.