Бөйрөгүн алмаштырууга муктаж 19 жаштагы Алымканга апасы донор болот

19 жаштагы Алымкан Улукбек кызына тез арада операция жасоо зарылдыгы жаралды. "Кызыма өзүмдүн бөйрөгүмдү берүүгө даярмын", - деди бүгүн, 30-июлда SUPER.KG порталына бейтаптын апасы Гүлшайыр Карабекова.

"Кызым бир жыл мурун ооруп калды. Дарыгерлер ага бөйрөгүнөн жабыркагандыгын айтышты. Эми тез аранын ичинде операция жасап, бөйрөгүн алмаштыруу зарыл. Антпесе ал жума сайын гемодиализ алып кыйналып жатат. Буга чейин 16 миң доллар акча каражатын тапканбыз. Бизге дагы кошумча 16 миң доллар керек болууда. Мындай каражат биздин үй-бүлөдө жок болуп жатат. Эгерде каражат табылып калса кызыма донор бар - ал менмин", - дейт Карабекова.

Алымкан Улукбек кызы Жалал-Абад шаарынын тургуну. Бир жылдан бери оору менен күрөшүп келет. Каражат табылса Тажикстанга же Индияга барып операция жасатууну мерчемдеген.

"Алымкандан башка дагы 5 кызым бар. 6-кызымды төрөгөндө жолдошум эркек бала төрөлбөдү деп бизди таштап кеткен", - деп кошумчалады ал.