2-августта Неймар "ПСЖга" өткөнүн расмий түрдө жарыялайт

Испаниянын "Барселона" футболдук клубунун жылдызы Неймар франциялык "ПСЖ" клубуна өтүү үчүн Катар өлкөсүндө 1-август күнү медициналык текшерүүдөн өтүп, 2-августта "ПСЖга" өткөнү тууралуу расмий түрдө жарыялайт. Бул тууралуу чет өлкөлүк басылмалар маалымдайт.

"Бразилиялык футболчу 1-августта Катар өлкөсүндө медициналык текшерүүдөн өткөн соң, "ПСЖ" клубунун президенти Нассер Аль-Хелаифи менен жолугуп, 2-августта "ПСЖга" өткөнү тууралуу расмий түрдө жарыялайт. Буга чейин белгилүү болгондой, Неймар "ПСЖга" өтсө ал Qatar Sports Investment компаниясы менен келишим түзүп, Катарда 2022-жылы өтө турган Дүйнө чемпиондугунун элчиси болот. Келишимдин негизинде Неймардын кызмат акысы 5 жылдын ичинде 300 миллион еврону түзөт", - деп жазылат маалыматта.

Эске салсак, буга чейин "ПСЖ" клубу Неймарды өзүнүн катарына чакырып, 222 миллион еврого сатып алууга даяр экенин билдирген.

Маалымдай кетсек, 29-июль күнү "ПСЖ" 2:1 эсеби менен "Монакону" утуп, Франциянын суперкубогун катары менен 5-жолу жеңип алды. Ошентип "ПСЖ" футболдук клубу Франциянын суперкубогун 7-ирет жеңип кетти. Белгилей кетсек, клуб суперкубокту 1995, 1998, 2013, 2014, 2015, 2016, 2017-жылдары жеңген.