Бюджеттик негизде окууга кабыл алуу аяктап, республика боюнча 421 орун бош калды

Жогорку окуу жайларга бюджеттик негизде окууга кабыл алуу аяктап, 421 орун бош калды. Бул тууралуу Билим берүү жана илим министрлиги бүгүн, 2-августта кабарлады.

Маалыматка ылайык, жалпысынан 3 турдун жыйынтыгында 4 420 абитуриент бюджеттик негизде окууга кабыл алынышкан. Буга чейин мамлекеттик жогорку окуу жайларына 5 440 бюджеттик орун бөлүштүрүлгөнү маалымдалган. Алардын 504ү жалпы республикалык тестирлөөдөн өтүүнү талап кылбаган адистиктерге берилген, ал эми 95и Кыргыз Республикасынынын президентине караштуу мамлекеттик башкаруу академиясынын магистратурасына берилген.

Абитуриенттерди кабыл алуунун 1-турунда 4 841 бюджеттик орунга сынак жарыяланып, 110 баллдан жогору алган 26 103 абитуриент катышып, алардын 2 508и кабыл алынган, 2-турда 4 миң, 3-турда 4 420.

"Кыргыз мамлекеттик техникалык университетинде 97, Ош техникалык университетинде 59, Жалал-Абад мамлекеттик университетинде 50, Кыргыз улуттук университетинде 45 бюджеттик орун бош калган", - деп билдиришкен министрликтен.

Контракттык негизде окууга кабыл алуу 25-августка чейин уланса, сырттан окуу бөлүмүнө кабыл алуу 30-августка чейин уланат.