Интернетке Патрулдук милициянын формасын кийбей кызматтык унаада отурган адам менен айдоочунун чыры тууралуу видео тарады

Интернетке Патрулдук милициянын кызматтык унаасында отурган адамдан милициянын формасын, документин талап кылган жарандын видеосу тарады. Видеого тартып жаткан адам андан милициянын формасы менен документин сураганда ал "сотрудник эмесмин" деп жооп берип, видеого тартып жаткан адамдын колундагы телефонду тартып алган.

Видеону Фейсбуктагы өзүнүн баракчасына жүктөгөн колдонуучу: "Адаттагыдай эле Патрулдук милиция токтотту, бирок бул кызматкердин кызматтык формасы жок экен. Ал Патрулдук милициянын кызматкери деген документин көргөзүүдөн да баш тартты. Унаанын документин алып алгандан кийин кайтарып бергиси келген жок. Аягында жөн эле телефонду колдон жулуп алды", - деп жазат.

Окуя 31-июль күнү Бишкек шарындагы Түштүк Магистраль көчөсүндө болгондугун интернеттеги билдирүүнүн ээси SUPER.KG порталына бүгүн, 2-августта кабарлады.