Текебаевдин жактоочулары премьер-министрди сотко чакырууну өтүнүштү

Бүгүн, 2-августта Жогорку Кеңештин “Ата Мекен” фракциясынын лидери Өмүрбек Текебаевдин жана мурдагы элчи Дүйшөнкул Чотоновдун үстүнөн козголгон кылмыш иши боюнча соттук отурум уланды.

Отурумда жактоочулар 2010-жылдын 13-майында Дүйшөнкул Чотоновдун Ош шаарына Бишкектен барганын далилдөө үчүн учурдагы өкмөт башчы Сооронбай Жээнбеков катардагы жаран катары көрсөтмө берүүсүн сурап өтүнүч келтирди.

“Эмне үчүн күбө катары Жээнбеков келиши керек? Ал ушул жерден келип 2010-жылы 13-майда өлкөнүн башына, өзүнүн башына кандай күн түшкөнүн айтып бериши керек. Ал Ош облустук мамлекеттик администрациясында контрреволюциялык аракеттер болгонун ал жерде абалды жөнгө салуу үчүн Чотонов, Исаковдор барганын айтып бериши керек”, - деди Текебаев.

Ал эми Чотонов Жээнбеков менен катар бир нече аткаминерлердин отурумга келишин сурады. Бирок сот өтүнүчтү колдогон жок.