Текебаев менен Чотоновдун сотунда жактоочу Маевскийдин 700 миң долларын Москвадан алып келген адамдын өздүгүн тактоону өтүндү

Бүгүн, 3-августта Бишкек шаарынын Биринчи Май райондук сотунда Өмүрбек Текебаев менен Дүйшөнкул Чотоновдун иши боюнча соттук отурум уланды. Отурумдун башында 2010-жылдары Текебаев отурган иш бөлмө Өкмөт үйүнүн кайсы тарабында экендиги тартылган видео көрсөтүлдү.

Андан соң Текебаев сотко кайрылып: "Буга чейин менин жактоочуларым 2010-жылдын 13-майында Бишкекте аба ырайы кандай болуп тургандыгын тастыктаган интернеттен алынган маалыматтарды ишке тиркеп коюуну өтүнгөн. Тилекке каршы, сиз өтүнүчтү четке каккансыз. Бүгүн мен кайра ошол өтүнүчтү келтирем. Себеби Алексей Модин 13-майда Бишкекте күн ысык болчу деп айтып жатат. Биздин маалыматтарга караганда ошол күнү күндүн ысыктыгы +17 градус болуптур. Мындай аба ырайы ысык деп эсептелбейт. Интернеттеги маалыматтарга ишенбесеңиз ӨКМнын алдында Кыргыз гидромет деген мекеме бар. Ошолорго кат жөнөтүп, аба ырайы тууралуу маалыматтарды алалы", - деген өтүнүчүн айтты.

Ал эми сот Айбек Эрнис уулу "өтүнүчтү канааттандыруусуз калтырам. Орусия өлкөсү бизге караганда суугураак. Суук жактан келген Модинге Бишкектеги +17 градус ысык болушу мүмкүн" деди.

Айыпталуучулардын жактоочусу Бакыт Жумашев: "Маевский берген көрсөтмөсүндө "Мен Москвадан Бишкекке учкан учак аркылуу бир адамдан 700 миң долларды берип жибергем" деп айткан. Анын айтымында, акча жөнөтөрдө жанында жан сакчылары, катчысы болгон. Биз ошол Москва-Бишкек аба каттамында ири суммадагы акчаны алып келген белгисиз адамдын аты-жөнүн тактоону өтүнөбүз", - деди.

Бирок сот мындай мүчүлүштүктөр тергөө маалында карала турганын айтып, өтүнүчтү четке какты.