Турмушка чыгуудан баш тарткан кыргыз кызы үйүнөн качып Москвадагы психиатриялык ооруканага жаткан

Кыргыз кызы ата-энесинин үйүнөн качып, Москвадагы психикалык жактан жабыркагандардын ооруканасына жаткан. Бул тууралуу кечээ, 3-августта Кыргыз мамлекетинин Орусиядагы элчилиги маалымдады.

Маалыматта айтылгандай, 2-август күнү элчиликке Кыргыз Республикасынын жараны К.Абдыкадыров кайрылып, кызын Москва шаарындагы №1-психиатриялык ооруканадан чыгарууга жардамдашууну өтүнгөн. Абдыкадыров кызы бул ооруканага өзүнүн каалоосу менен жаткырылбагандыгын кошумчалаган.

"Буга байланыштуу элчиликтин кызматкерлери аталган медициналык жайга барып, Абдыкадыровдун кызы К.Аны дарылаган дарыгер менен жолугушту. Дарыгер К.А. ооруканага ушул жылдын 29-июль күнү оюна келгенин жөөлүп жаткан жана фантастикалык ойлордун таасиринде жүргөн абалына байланыштуу жаткырылганын айткан", - деп жазылат маалыматта.

Дарыгерден кийин элчиликтин кызматкерлери К.Анын өзү менен жолугуп сүйлөшкөндө, ал кыз акыркы 6 ай ичинде ата-энесинин катуу басмырлоосунда жүргөнүн билдирген. Өзгөчө аны апасы катуу кысымга алып, бейтааныш жигитке өздөрүнүн кызыкчылыгы үчүн күйөөгө берүүгө аракет кылып жаткандыгын айткан. Ата-энесинин кысымынан улам К.А. Кыргыз мамлекетинен качып ооруканага жатууну көздөгөн.

Москва шаарындагы Симонов райондук сотунун чечими менен К.А. ооруканадан чыгарылып, атасына тапшырылган.