Өмүрбек Текебаев 2010-жылы 13-майда кайда жана эмне менен алек болгонун айтты

Бүгүн, 4-августта Бишкек шаарынын Биринчи Май райондук сотунда Өмүрбек Текебаев менен Дүйшөнкул Чотоновдун иши боюнча соттук отурум өтүүдө. Отурумдун башында Текебаев өз көрсөтмөсүн видео жана сүрөткө тартууга уруксат берүү өтүнүчүн сурады. Бирок сот өтүнүчтү четке какты.

Жактоочу Текебаевден Маевский менен кандай жагдайда жана эмне себеп менен жолукканын сурады.

“2010-жылы Убактылуу өкмөттүн мүчөлөрүнүн өмүрүнө реалдуу коркунуч жаралып, алардын өмүрүнө кол салуу болушу мүмкүн экендиги тууралуу маалыматтар келип турган. Ошондуктан ал учурда менин тегерегимде 20дан ашык жан сакчылар жүргөн. 12-май күнү Бишкекте революцияга каршы аракеттер болду. Биз өмүрүбүздү тобокелге салып жумушубузду таштап кеткенибиз жок. 13-майда да түнкү саат 12ге чейин отуруп иштедик. 13-май күнү саат 8де Роза Исаковнанын тапшырмасы берилип, “Хаят” мейманканасында жыйынды ачтым. Саат 13:30га чейин ошол жерде болуп, 14:00гө жакын өкмөт үйүнө келдим.

Ошол маалда Ош менен Жалал-Абадды куралданган адамдар басып алган. Убактылуу өкмөт өлкөнүн жарымын колдон чыгарган. Убактылуу өкмөттүн мүчөлөрү ошол учурдагы абалды талкууладык. Ошондо Исаковду түштүк аймагына Убактылуу өкмөттүн атайын өкүлү кылып дайындадык. Саат 4төр чамасында Исаков менен Чотонов Ошко учуп кетишкен. Андан соң мен Конституциялык жыйынга кеттим. Ал жерден кечки саат 9га жакын өкмөт үйүнө келдим. Ал күнү каалаган күндө да мен Маевский менен жолугууга мүмкүнчүлүк болбойт болчу", - деди Текебаев.