Украинада психиатриялык ооруканада жаткан адамдын колунан 10 бейтап, полициянын 5 кызматкери жабыркады

Украинанын Львов шаарындагы психиатриялык ооруканада жаткан адамдын колунан 10 бейтап, полициянын 5 кызматкери жабыркады. Окуя кечээ, 4-августта саат 19:00дөр чамасында болгонун жергиликтүү маалымат каражаттары жазууда.

Маалыматка ылайык, чуу салган адам Львов шаарынын 30 жаштагы тургуну болгон. Ал 2013-жылдан бери соттун чечими менен психиатриялык ооруканага дарыланууга жаткырылган. Сот ага карата мындай чечимди өзүнүн атасына 72 жолу бычак сайып өлтүргөндөн кийин чыгарган.

Мындан бир ай мурун ал бейтап үйүнө чыгарылып, бирок туугандарынын арызы менен кайрадан ушул жылдын 3-августунда ооруканага жаткырылган.

"30 жаштагы бул эркек адам 76 бейтап жаткан мекеменин эшигин бекитип алып, терезелерди сындырган. Андан кийин айнектин сынган бөлүгү менен 10 адамга кол салган. Алардын үчөөнүн абалы азыркы убакта оор. Полиция келип ал жаранды курчоого алган учурда ал айнектин сынган бөлүктөрү менен аларга да кол салып, 5 кызматкер денесинен жеңил жаракат алган", - деп жазылат маалыматта.

Учурда жабырлануучуларга тиешелүү медициналык жардамдар көрсөтүлүүдө.