Москвада жумушсуз калып, психикалык ооруга кабылган Кыргыз жараны мекенине кайтарылат

Москвага бир жыл мурда барып, 3 айдан бери жумушсуздуктун айынан психикалык дартка чалдыккан Кыргыз жараны бир тууганынын коштоосунда мекенине кайтарылат. Бул туурасында Кыргыз Республикасынын Орусиядагы элчилигинен кабарлашты.

"2017-жылдын 7-августунда Москва шаарынын Симоновский райондук соту Н.А.Алексеев атындагы №1-психиатриялык клиникалык ооруканасында 1979-жылкы К.М. аттуу Кыргыз жаранынын ыктыярдуу дарыланууга көнбөгөндүгүнө байланыштуу соттук отурум өткөргөн. Мекендешибиздин укугун коргоо максатында Орусиядагы Кыргыз элчилигинин кызматкерлери оорукананын жетекчилиги менен жолугушуу өткөрдү. Анда Кыргыз жараны аталган ооруканага ушул жылдын 3-августунда психикалык жактан жабыркап түшкөндүгү аныкталган. Ал Орусияга 1 жыл мурда келгенин, 3 айдан бери жумушу жок калганын жана 1 жылдан бери жакындары менен байланышы үзүлгөнүн айткан. Ошондой эле анын документтери да жоголгону такталган. Учурда элчиликтин жардамы менен анын бир тууганы табылып, мекенине кайтаруу боюнча күбөлүк даярдалды. Жакынкы күндөрү бир тууганынын коштоосунда Кыргыз өлкөсүнө жөнөтүлөт", - деп айтылат маалыматта.