Кыргыз-Өзбек мамлекеттик чек арасын тактоо боюнча Өкмөттөр аралык комиссиянын кезектеги жыйыны Чолпон-Атада өтөт

15-17-августта Чолпон-Ата шаарында өтүүчү Кыргыз-Өзбек мамлекеттик чек арасын делимитациялоо жана демаркациялоо боюнча Өкмөттөр аралык комиссиянын кезектеги жыйынына Өзбекстан Республикасынын премьер-министри Абдулла Арипов келет. Бул тууралуу Кыргыз Республикасынын өкмөтүнүн аппаратынын маалыматтык камсыздоо бөлүмү билдирди.

Кыргыз менен Өзбекстандын өкмөт башчылары жыйынга болгон даярдыктарды талкуулашты.

Сооронбай Жээнбеков менен сүйлөшүүсүндө Абдулла Арипов Кыргызда ушул жылдын октябрь айында өзбек маданият күндөрүн өткөрүүгө өзбек тараптын даярдыгын тастыктады. Ал ошондой эле кыргыз тарапка 3-августта Ысык-Көл облусунун аймагында кырсыкка кабылган Өзбекстан Республикасынын жарандарына өз убагында көрсөткөн жардамы үчүн ыраазычылыгын билдирген.

Премьер-министр Сооронбай Жээнбеков өзбек тарапка Ош шаарында 630 орундуу жалпы билим берүү мектебин куруу тууралуу чечими үчүн ыраазычылык билдиргени маалым болду.