Айпери Медет кызы күрөш боюнча кыздар арасындагы Дүйнө чемпиондугунан Кыргыз тарыхындагы алгачкы алтын медалды алып келди

Айпери Медет кызы күрөш боюнча жаш кыздар арасындагы Дүйнө чемпиондугунан Кыргыз тарыхындагы алгачкы алтын медалын алып келди. Бул тууралуу күрөш боюнча Кыргыз кыз-келиндер курама командасынын машыктыруучусу Нурбек Изабеков Жаштар иштери, дене тарбия жана спорт агенттигине билдирген.

Маалыматка ылайык, Айпери Медет кызы жаштар арасындагы күрөш боюнча Дүйнө чемпиондугунда 72 килограммга чейинки салмак ченинде күрөшүп алтын медаль жеңип алган.

"Айпери Кыргыз курамасынын капчыгына алтын медаль алып келгенге үлгүрдү. Бул чоң жетишкендик. Анткени биз, Кыргыз тарыхында биринчи жолу жаш кыздар арасындагы Дүйнө чемпиондугунда алтын медалды жеңип алдык", - деди Нурбек Изабеков.

"Бардыгы аябай жакшы өттү. Мен үчүн оор эле болду, бирок мен ага карабай жалпысынан 4 беттеш өткөрүп, жеңишке жеттим", - деди өз сөзүндө Айпери Медет кызы.

Эске салсак, Финляндиянын Тампере шаарында 1-6-август аралыгында өткөн жаштар арасындагы күрөш боюнча Дүйнө чемпиондугунда Айпери Медет кызы финалда япониялык балбан Ясухи Мацуюки менен беттешип, 8:6 эсеби менен жеңип алган.

Аталган мелдешке 14 Кыргыз балбаны катышып, грек-рим күрөшү боюнча Акжол Махмудов, Жоламан Шаршенбеков жана Роман Ким күмүш медалдарын, эркин күрөш боюнча Акбар Кенжебек уулу коло медалын жана кыздар арасындагы мелдеште Айпери Медет кызы алтын медаль, Мээрим Жуманазарова коло медалын жеңип алып. Кыргыз курама командасы жалпы командалык эсепте 5-орунга ээ болгон.