Ошто сатылып жаткан коон, дарбыздарда нитраттар нормадан 3 эсе көп экендиги аныкталды

Ош шаарындагы базарда сатылган жашылча-жемиштердин курамы текшерилди. "Анын жыйынтыгында дарбыз, коондордо нитрат ашыкча өлчөмдө экендиги аныкталды" деп билдирди бүгүн, 9-августта Ош шаардык фитосанитардык жана ветеринардык инспекциянын кызматкери Сейдали Досов SUPER.KG порталына.

"Борбордук базарда сатылган дарбыз, коондордун курамында 193 миллиграммга чейин нитрат аныкталды. Аны атайын аппараттар менен текшерип чыктык. Негизи норма боюнча нитраттын курамы дарбызда 60 миллиграммдан ашпаш керек. Химиялык кошулмалардын жашылча-жемиштерде ашыкча болушу адамдын ден соолугуна зыян келтирет. Текшерүүнүн жүрүшүндө картошка, пияз, сабиз жана башка жашылчаларда нитрат жана азоттун кошулмасы өз нормасында экендиги аныкталды", - дейт Досов.

Ал кошумчалагандай, курамында нормадан ашыкча жер семирткичтери бар жашылча-жемиштерди сатып жаткан сатуучуларга оозеки эскертүүлөр берилди. Ошко жашылчалар Казакстандын Чымкент аймагынан, Жалал-Абад облусунун Шамалды-Сай, Ош облусунун Кара-Суу, Өзгөн райондорунан алынып келинет.