Мэрия: "Бишкектеги сейил бактарды оңдоп-түзөөгө 30 миллион сом бөлүндү"

Бишкекте жайгашкан Дайыр Асанов атындагы "Жеңиш" сейил багын, Жаштар, Фучик, Кара-Жыгач парк-скверлерин реконструкциялоого мэрия тарабынан быйыл биринчи жолу 30 миллион сом бөлүнгөнүн бүгүн, 9-августта өткөн тегерек столдо вице-мэр Эркинбек Исаков билдирди.

"Сейил бактар жана Бишкектин жашыл зоналары. Маселелер жана аны чечүү жолдору" деген аталышта өткөн жыйынга "Бишкек башкы архитектура" ишканасынын өкүлдөрү, Бишкек шаарынын вице-мэри, коомдук ишмерлер жана жарандык активисттер катышып, шаардагы сейил бактардын абалы тууралуу маселелерди талкуулашты.

Тегерек столдо борбор калаада республикалык маанидеги макамга ээ 15 сейил бак бар экендиги, алардын алтоосуна гана "Жашылдандыруу" ишканасы ээлик кылары айтылды. Ошондой эле активисттер Кыргыз Республикасынын Жер кодексинде "парк" деген сөз кездешпей турганын айтып, мындан улам укук бузуулар болуп сейил бактардын абалы начарлап баратканын билдиришти.

"Сейил бактарды көзөмөлдөөчү саясат жүргүзө турган департамент түзүлмөйүнчө ар кандай маселелер жарала берет. Бишкектеги сейил бактардын чек аралары белгиленбегендиги үчүн анын аймактарына убакыт өткөн сайын мыйзамсыз түрдө кыскарып жатат", - деди коомдук ишмер Гульнара Каликова.

Жыйында видеосюжет көрсөтүлүп, анда коммерциялык багытта ижарага берилген сейил бактар, анда мыйзамсыз курулуп жаткан турак үйлөр, имараттар тууралуу маалыматтар берилди.