Түркияда Фетхуллах Гүлен менен байланышы бар деген шек менен 35 журналист кармалды

Түркиянын Стамбул шаарынын прокуратурасы тарабынан оппозициячыл дин аалымы Фетхуллах Гүлен менен байланышы бар деген шек менен 35 журналист кармалды. Бул тууралуу Түркиянын басылмалары жазып чыгышты.

Маалыматка ылайык, кармалган журналисттер ByLock программасын колдонушкан. Түрк бийлиги бул программа Гүлендин уюму жашыруун маалымат алууда колдонулган деп билдирген.

Кармалган журналисттердин жашаган жери тинтүүгө алынган.

Айта кетсек, өткөн жылдын 15-июлдан 16-июлга караган түнү козголоңчулар Түркияда бийликти басып алууга аракеттенген. Бирок алардын аракети ишке ашпай, мамлекеттик төңкөрүштө 290 адам мерт болуп, козголоңду уюштурууга тиешеси бар делип 26 миңдей адам кармалган.

Түрк бийлиги төңкөрүш аракетине Гүленди күнөөлөп, АКШдан аны экстрадиция кылууну суранган. Бирок дин аалымы көтөрүлүштү сынга алып, ага тиешеси жок экендигин айтып чыккан. Гүленди кайтаруу боюнча Түркиянын өтүнүчүн Америка дагы деле аткара элек.