Путинди туураган пародист тууралуу комедия тартылат. Буга президент макулдугун берди

Орус президенти Владимир Путинди туураган "Камеди Клаб" долбоорунун катышуучусу Дмитрий Грачев тууралуу комедия тартыларын, ага президент өзү макулдугун бергендигин "Комсомольская Правда" гезитине берген интервьюсунда режиссёр Николай Досталь билдирди.

"Биз куудул Геннадий Хазанов экөөбүз өмүр бою бир гана адамды туурап келген артист-пародист Дмитрий Грачев тууралуу фильм тартууну ойлоп жүргөнбүз. Билесиздер, Грачев КВНде, интернетте, "Камеди Клабда" дайыма президентти туурап келет. Бир жолу ал президенттин бийликтен кетип, өзүнүн жумушсуз калганын түш көрөт. Андан ары эмне болот, кино ушул жөнүндө", - дейт режиссёр.

Анын айтымында, комедияда "Сен оригинал болуп төрөлдүң, бирөөнүн көчүрмөсү болуп өлбө" деген ой айтылат. Дмитрий Грачев башкы ролду - өзүнүн образын жаратууга макул болгон.

"Фильм башкы каарман жөнүндө гана эмес, анда берилген ой баарыбызга тиешелүү. Бул комедиянын тартыла турганын Владимир Путин дагы билет, ал каршы эместигин билдирди", - дешет жаратуучулар.