Текебаевдин сотуна Роза Отунбаева келди

Бүгүн, 11-августта Жогорку Кеңештеги “Ата Мекен” фракциясынын лидери Өмүрбек Текебаев жана мурдагы элчи Дүйшөнкул Чотоновдун үстүнөн козголгон кылмыш иши боюнча соттук отурум өтүүдө. Отурумда айыпталып жаткан Өмүрбек Текебаевге жарыш сөз берилди.

Отурумга Кыргыз Республикасынын экс-президенти Роза Отунбаева келди. Учурда соттук отурумда Жогорку Кеңештеги “Ата Мекен” фракциясынын депутаттары Аида Салянова, Наталья Никитенко, Сайдулла Нышанов, Каныбек Иманалиев, Эмил Токтошев маалымат каражаттары жана айыпталуучунун жакын туугандары күбө болууда.

Эскерте кетсек, 2017-жылдын 25-февралында Кыргыз Республикасынын Башкы прокуратурасы тарабынан "Ата Мекен" фракциясынын лидери Өмүрбек Текебаевге "коррупция" жана "алдамчылык" беренелери боюнча кылмыш иши козголуп, ошол эле күнү УКМКнын Тергөө башкармалыгына өткөрүлүп берилген. 26-февралда козголгон кылмыш ишинин алкагында Текебаев менен Чотонов камалган.

Башкы көзөмөл органдын маалыматы боюнча аларга орусиялык ишкер Леонид Маевскийдин арызынын негизинде иш козголгон. Маевский өз арызында Текебаев "Мегаком" иши боюнча 1 миллион доллар алып, аны кайтарбай койгонун айткан.

Прокурор соттон Өмүрбек Текебаевди 10 жылга, Дүйшөнкул Чотоновду 8 жылга эркинен ажыратууну сураган.