Текебаевдин жарыш сөзүн угуу үчүн келген Бекназаровду, Ташиевди, Байсаловду сотко киргизбей коюшту

Бүгүн, 11-августта Жогорку Кеңештеги “Ата Мекен” Фракциясынын лидери Өмүрбек Текебаев жана мурдагы элчи Дүйшөнкул Чотоновдун үстүнөн козголгон кылмыш иши боюнча соттук отурум өтүүдө. Отурумда айыпталып жаткан Өмүрбек Текебаев жарыш сөзүн айтып жатат.

Түштөн кийин Текебаевдин сотуна бир катар саясатчылар Роза Отунбаева, Азимбек Бекназаров, Камчыбек Ташиев, Кеңешбек Дүйшөбаев, Равшан Жээнбеков, Эдил Байсалов күбө болуу үчүн келишти. Алардын айрымдарын тартип сакчылар сот залына киргизбей коюшту. Буга чейин сотко экс-президент Роза Отунбаева келгени айтылган.

Эскерте кетсек, 2017-жылдын 25-февралында Кыргыз Республикасынын Башкы прокуратурасы тарабынан "Ата Мекен" фракциясынын лидери Өмүрбек Текебаевге "коррупция" жана "алдамчылык" беренелери боюнча кылмыш иши козголуп, ошол эле күнү УКМКнын Тергөө башкармалыгына өткөрүлүп берилген. 26-февралда козголгон кылмыш ишинин алкагында Текебаев менен Чотонов камалган.

Башкы көзөмөл органдын маалыматы боюнча аларга орусиялык ишкер Леонид Маевскийдин арызынын негизинде иш козголгон. Маевский өз арызында Текебаев "Мегаком" иши боюнча 1 миллион доллар алып, аны кайтарбай койгонун айткан.

Прокурор соттон Өмүрбек Текебаевди 10 жылга, Дүйшөнкул Чотоновду 8 жылга эркинен ажыратууну сураган.