Текебаевдин соту 8:30да башталып, 20:00дө аяктады. Эми дүйшөмбү күнү уланмай болду

Бүгүн, 11-августта Бишкек шаарынын Биринчи Май райондук сотунда Өмүрбек Текебаев менен Дүйшөнкул Чотоновдун иши боюнча соттук отурум өттү. Текебаев сотто жарыш сөзүнүн жарымынан көбүн окуп бүткөнүн тыныгуу учурунда журналисттерге айтты. “Мен дагы 3 же 4 саатта бүтүшүм мүмкүн. Азыр 112 барактан турган жарыш сөздүн 80-барагына жеттим”, - деди Текебаев.

Соттук отурум башталгандан кийин Чотоновдун жактоочусу Марат Эшперов соттон кайсы мыйзамга таянып сот жумуш убактысынан кийин отурумду улантып жатканын сурады.

Сот “биз соттук отурумду жапкан эмеспиз. Ошондуктан соттук отурумду улантабыз” деп жооп берди.

Жактоочу Канат Хасанов: “Сиз саат 17:30дан кийин жумуш убактысынан тышкары сот эмессиз. Ошондуктан жумуш убактысынан кийин биз чыгып кетсек, сиз кабыл алган чечимдер да мыйзамсыз болот. Анткени жумуш убактысынан кийин сотту улап Конституциялык укуктарды бузуп жатасыз”, - деди.

Сот мурдагы жообун кайталап: “Соттук процессти биз жаба элекпиз. Мыйзамда отурумду токтотуунун сааты конкреттүү көрсөтүлгөн эмес. Силер сотко баш ийишиңер керек”, - деп жооп берди.

Жактоочу Чынара Жакупбекова: “Айыпталуучу сүйлөп бүткөнгө чейин соттук отурум болушу керек деген кайсы мыйзамда бар? Сиздин аракетиңиз шек жаратып жатат. Текебаев канча сааттан бери сүйлөп жатат. Ал чарчады, адашышы же оюн толук айта албай калышы мүмкүн. Эмгек кодексинде көрсөтүлгөн убакыттан кийин токтотолу да. Биздин да үй-бүлөбүз бар”, - деди.

Бир канча талаш-тартыштан кийин сот дүйшөмбүгө чейин тыныгуу жарыялады.