Дүйнөнүн эң кары эркек адамы 113 жашында каза болду

Израилдин Хайфа шаарында Жер планетасынын учурдагы эң кары эркек адамы деп эсептелинген Исраэль Криштал каза болду. Бул тууралуу чет элдик басылмалар жазып чыгышты.

Маалыматка ылайык, Исраэль Криштал 1903-жылы 15-сентябрда Польшада төрөлгөн. Ал өмүрүнүн көп бөлүгүндө кондитердик жумуштар менен алектенген. 1944-жылы 41 жашында еврейлерди тукум курут кылабыз деген немис баскынчылары тарабынан Освенцим шаарынын жанындагы "өлүм лагерине" камалып, ал жакта үй-бүлөсү бүт каза болуп, жалгыз өзү аман калган. Ал "өлүм лагеринен" чыкканда болгону 33 килограмм салмакта болгон.

Кийин 1950-жылы Израилге көчүп кетип, калган өмүрүн ошол жакта өткөргөн. Ал 1 айдан кийин 114 жашка толмок. Криштал 2016-жылы 19-январда "Дүйнөнүн эң кары эркек адамы" деп табылып, "Гиннесстин рекорддор китебине" кирген.

Ал эми учурдагы эң кары аял - Вайолет Браун 117 жашта.