Кыргыз-казак чек арасынан мыйзамсыз өтүүгө аракет кылган жарандарга ок атылды. Бир адам каза болгону айтылды

Кыргыз өлкөсүнөн Казакстанга мыйзамсыз өтүүгө аракет кылган жарандарга ок атылды. Бул тууралуу бүгүн, 13-августта РИА Новости маалымат агенттиги казак чек ара кызматына шилтеме берип жазып чыкты.

Маалыматта окуя кечээ, 12-августта болгону, анда кыргыз-казак чек арасынан 15ке жакын адам мыйзамсыз өтүүгө аракет кылганы айтылат. "Аларды байкап калган чек арачыларга жарандар баш ийбей каршылык көрсөткөн. Чек ара кызматкерлери тарабынан 2 ирет ок чыгарылып, бир адам жарадар болгон. Тартип бузгандар жарадар адамды таштабай өздөрү менен алып качышкан. Кийин анын каза болгону маалым болгон", - деп айтылат билдирүүдө.

Азыркы тапта качып кеткен жарандарды издөө жана тактоо иштери уланууда. Окуя болгон Тараз аймагынын чек арасы күчөтүлгөн тартипте иштеп жатат.