Бүгүн Текебаев менен Чотоновдун иши боюнча соттук отурум уланат

Бүгүн, 14-августта Бишкек шаарынын Биринчи Май райондук сотунда Өмүрбек Текебаев менен Дүйшөнкул Чотоновдун иши боюнча соттук отурум уланат. Азыркы тапта сот имаратынын алды милиция кызматкерлери тарабынан курчоого алынган.

11-августта Текебаев менен Чотоновдун соту 8:30да башталып, 20:00дө аяктаган болчу. Анда жактоочулар "Кайсы мыйзамга таянып сот жумуш убактысынан кийин отурумду улантып жатат?" деп нааразы болушкан. Ал эми Текебаев жарыш сөзүнүн жарымынан көбүн окуп бүткөнүн айткан.

Прокурор соттон Өмүрбек Текебаевди 10 жылга, Дүйшөнкул Чотоновду 8 жылга эркинен ажыратууну сураган.

Эскерте кетсек, 2017-жылдын 25-февралында Кыргыз Республикасынын Башкы прокуратурасы тарабынан "Ата Мекен" фракциясынын лидери Өмүрбек Текебаевге "коррупция" жана "алдамчылык" беренелери боюнча кылмыш иши козголуп, ошол эле күнү УКМКнын Тергөө башкармалыгына өткөрүлүп берилген. 26-февралда козголгон кылмыш ишинин алкагында Текебаев менен Чотонов камалган.

Башкы көзөмөл органынын маалыматы боюнча, аларга орусиялык ишкер Леонид Маевскийдин арызынын негизинде иш козголгон. Маевский өз арызында Текебаев "Мегаком" иши боюнча 1 миллион доллар алып, аны кайтарбай койгонун айткан.