"Реал Мадрид" Испания Суперкубогунун биринчи оюнунда "Барселонаны" жеңип алды

Испания Суперкубогунун алкагында "Барселона" жана "Реал Мадрид" клубдарынын беттеши орун алды. Суперкубоктун биринчи беттеши "Камп Ноу" стадионунда өтүп, "Реал Мадрид" 3:1 эсебинде жеңишке жетти.

Оюндун 1-таймы 0:0 эсебинде жыйынтыкталды. 50-мүнөттө "Реал Мадриддин" футболчуларынын чабуулун "барселоналык" Жерар Пике жыйынтыктап, өзүнүн дарбазасына гол киргизди. 77-мүнөттө Лионель Месси пенальтиден гол киргизип, эсепти теңдей алды. 4-мүнөт өтпөй алмашууга чыккан Криштиану Роналду таамай сокку менен эсепти 2:1ге өзгөртө алды. 88-мүнөттө Роналду экинчи сары айып кагазын алып, талааны таштаганга аргасыз болду. "Реал Мадрид" клубунун оюнчулары азчылыкта калганына карабай эсепти 3:1 кылганга жетишти. Акыркы голду "Реал Мадрид" клубунун оюнчусу Марко Асенсио киргизди.

Бул жыйынтык менен "Реал Мадрид" футболдук клубу жооптук оюнда артыкчылыкка ээ болот. Жооптук беттеш 17-августта Сантьяго Бернабеу стадионунда орун алат.

Барселона - Реал Мадрид 1:3

Голдор: Месси 76-мүнөттө (пенальтиден), Пике 50-мүнөттө (өз дарбазасына), Роналду 80-мүнөттө, Асенсио 90-мүнөттө