Башкы прокуратура: “Болот Шерге кылмыш иши козголгон эмес”

"Жогорку Кеңештин депутаты Болот Шерге карата 2010-жылы мурдагы президент Курманбек Бакиевдин мүлкүн басып алгандыгы тууралуу кылмыш иши козголгон эмес". Бул маалыматты бүгүн, 22-майда Башкы прокуратуранын басма сөз кызматы депутаттын айткан сөзүнө жооп катары билдирди. Мекеменин маалыматы боюнча, 2012-жылдын 22-август күнү Курманбек Бакиевдин мүлкүн тартып алган адамдарга карата козголгон иш 2013-жылдын 29-январында токтотулган. Кайра бул иш 21-майда ИИМдин тергөө башкармалыгы тарабынан козголду. Эске салсак, бүгүн, 22-майда ЖКнын жыйынында "мыйзамдагы ууру" Азиз Батукаевдин абактан эрте бошотулушун жана өлкөдөн чыгып кетишин иликтеген депутаттык комиссиянын төрагасы Болот Шер ага карата Башкы прокуратура кылмыш ишин козгогондугун билдирген болчу.