"Сиңдим күйөөгө тийгенден кийин кайын журту менен жашай албай кыйналдым десе көңүл бурган эмес элек, эми айрылып калдык" дейт маркумдун эжеси

2017-жылдын 24-июнунда Өзгөн районунун тургуну 21 жаштагы Мээримгүл Батырбек кызы каза болгон. Маркумдун бир тууган эжеси Анипа Батырбек кызы "сиңдим күйөөгө тийгенден кийин кайын журту менен жашай албай кыйналдым десе көңүл бурган эмес элек, эми айрылып калдык. Анын өз жанын кыйышына ишенбейбиз, анын өлүмүнө себепчи болгондор жазасын алсын" деп билдирди.

Өзгөн аймактык ооруканасынын директору Сатар Жусупов: "Ооруканага келгенде кыздын жүрөгү сокпой, дем алуусу да жок экен. Каректери чоңоюп бозоргон, моюнунда жиптин тагы бар эле", - деди.

Маалым болгондой, Мээримгүл Батырбек кызы 1996-жылы туулган. 2017-жылы 5-майда турмушка чыккан. Атасы Батырбек Төрөгелдиев кызы турмушка чыккандан кийин кыйналып жатканын айтып алып кетүүсүн суранганын билдирди.

"23-июнда апасы кызым жөнүндө мага айтканда бүгүн арапа күн, эртең анан өзүбүз баралы дедик. 24-июнда эртең менен эл кыдырып куран окуп жүрсөк кызым чалып "сиңдим Мээрим ооруканага түшүп калыптыр" деди. Барсак кызым көк ала болуп жатыптыр. Кайненеси кызымды "тепкичтен түшүп келе жатып жыгылды" кийин "кой кармап турду эле ал сүйрөп кетти" деп ар кандай сүйлөптүр. Кой сүйрөп кетсе мынчалык болбойт дешсе ташка чалынып жыгылган деп ар кандай сөздөрдү айткан. Күйөө балам болсо "23-июнда досторум менен түнү бою унаанын ичинде сүйлөшүп отурганбыз. Эртең менен турсам өзүн өзү сарайга барып асынып алыптыр" дептир. Анын асынганын бир дагы кошунасы же тууган-уругу көрүп, угушкан эмес. Эмнеге бир адамды күбө катары көргөзүп койбойт?

Денесиндеги көк аласы, жаагынын сынганы көрүнүп турса да соттук медициналык экспертиза туура эмес жыйынтык чыгарды. Прокуратурага кайрылдык эле баланы эки күнгө камакка алды. "Өзүн өзү өлтүрүүгө жеткирүү" беренеси менен айыпталып кармалгандан соң Өзгөн райондук сот Нуржамал Артыкова анын баш коргоо чарасын карап үй камагына чыгарыптыр", - дейт.

Ош облустук ички иштер башкармалыгынын басма сөз катчысы Жеңиш Аширбаев: "Жабырлануучулардын арызынын негизинде маркумдун күйөөсү шектүү катары 48 саатка камакка алынган. Кийин соттун чечими менен үй камагына чыгарылган. Учурда тергөө жүрүүдө", - деди.