Футбол боюнча Кыргыз кыз-келиндер курамасы Казакстан курамасын 3:0 эсебинде жеңип алды

Бишкек шаарында 15-20-август аралыгында өтүп жаткан "3 улуттун кубогу" аттуу футбол боюнча кыз-келиндер арасындагы эл аралык жолдоштук мелдештин алгачкы беттешинде Кыргыз курамасы Казакстан курамасын жеңип алды. Бул тууралуу футбол федерациясы маалымдайт.

Футболдук борбордун стадионунда орун алган беттеш 3:0 эсебинде жыйынтыкталды. 1-таймда 2 команда тең эсепте эс алууга кетишти. 2-таймдын башында Кыргыз футболчусу Малика Кадырова казак дарбазачысы менен бирге бир келип эсеп санын ачкан. 69-мүнөттө Рамина Цой эсепти 2:0 кылганга үлгүрдү. Оюнга чекитти 74-мүнөттө Рамина Цой койду. Анын таамай соккусу дарбазанын бурчуна кирген.

Бүгүн, 16-августта футболдук борборунун талаасында Казакстан-Өзбекстан беттеши орун алат. Башталышы саат 17:30.

Кыргыз курама командасы - Казак курама командасы - 3:0

Голдор: Малика Кадырова (46), Рамина Цой (69, 74).

Беттештин мыкты оюнчусу: Рамина Цой.