Супер-Инфо
super.kg видео
Жактоочу Текебаевди соттоо боюнча сценарийди ким түзгөнү боюнча пикирин айтты
Бүгүн, 16-августта Жогорку Кеңештеги “Ата Мекен” фракциясынын лидери Өмүрбек Текебаевдин жана мурдагы элчи Дүйшөнкул Чотоновдун үстүнөн козголгон кылмыш иши боюнча соттук отурум уланды. Отурумда жактоочу Канат Хасанов жарыш сөзүн сүйлөдү.
"Белизгейт” боюнча жасалма документтер коомчулукка чыккандан кийин “Ата Мекен” фракциясы УКМКнын жетекчиси Абдил Сегизбаевдин жоопкерчилигин кароо жана жумуштан кетирүү талабын койгон эле. Бул жоопкерчиликтен качуу үчүн Сегизбаев "Мегакомдун" акцияларына байланыштуу сценарий түзүп, Текебаевге карата кылмыш ишин козгоп жатат. Текебаевдегидей тарых Кыргыз саясатчыларынын эч биринде жок. Бул процессте сизге тарыхый миссияны аткарып, соттун көз карандысыз экенин далилдей турган укук берилген. Бул айыптоо негизсиз. Бардык кесиптештеримдей эле бардык материалдарды объективдүү карап туура баа берүүңүздү, адилет чечим чыгарып, Текебаевди актап берүүңүздү суранам. Текебаев бул карапайым элдин укугу үчүн күрөшкөн жана күрөшө турган адам. Кыргыз элине сиз көз карандысыз сот экениңизди көрсөтүңүз", - деп жарыш сөзүн аяктады Хасанов.
Эскерте кетсек, 2016-жылдын 14-ноябрында Улуттук коопсуздук мамлекеттик комитетинин төрагасы Абдил Сегизбаев президент Алмазбек Атамбаевге "Мегаком" чуусун териштирүүгө байланыштуу маалымат берген.
УКМКнын башчысы Белиз мамлекетинин расмий органдарынан траст документтери (апостиль) алынганын, ал документтер 2012-жылы апрелде "Альфа Телеком" ("Мегаком") компаниясынын ошол учурдагы акцияларынын улутташтырыла элек бөлүгүн сатуудан түшкөн 50 миллион доллардан ашык сумманы "Саутфилд" компаниясынын алышына мурдагы жогорку кызматтагы үч адамдын (азыр Кыргыз Республикасынын Жогорку Кеңешинин депутаттары) кызыкдар болгонун күбөлөй турганын айткан.
Өмүрбек Текебаев "Мегаком" боюнча Улуттук коопсуздук мамлекеттик комитети жарыялаган документтердин жасалма экенин билдирген.
2017-жылдын 27-июлунда президент Алмазбек Атамбаев Чолпон-Атадагы маалымат жыйынында эгер бул иш такталбаса, Абдил Сегизбаев жооп бере турганын айткан. "Прокуратурадан улам маалымат алып турам, бул ишти унутулду дегенге болбойт. Мени атайын унуттуруп жатат дебегиле, мен унуткан жокмун. Прокуратура кат жиберип (Белизге), кат алып жатат. Мен айткандай эле бул иш тастыкталбаса УКМКнын башчысы Абдил Сегизбаев жооп берет. Иш жүрүп жатат, мен кызматтан кеткиче жыйынтыгы чыгып калышы мүмкүн", - деген президент.
-2
1 |